الشباب المسحراتي
يا رب في الشهر الكريم
اهدي العاصي والغشيم
وتوب علينا برحمتك
دا انت الكرم وانت الكريم
إصحى يا ريس عبدالكريم
أنا من اللي جوايا بقول
مهما اللي فيَّ راح يطول
وسحوري مكتوب في الزمن
طورشي وفلافل ويا فول
اصحى يا سيدنا عب الجليل
بنادي مصر قالتلي مين
قلت اللي عاشقك من سنين
معايا مفتاح الزمن
فاكراني يا ام الطيبين
وحد يا عم الشيخ ياسين
يا سلام يا بلدي عل كان
وانت زعيمة من زمان
ولا حد يكسر كلمتك
يهز بابك والحيطان
اصحى وفوق يا سليمان
أنا قولي بلسم ع الشهيد
اللي بدمه جبنا عيد
ولا حد حا يجيبنا لورة
ما دام بنتحدى الحديد
فوق بقى يا بو الشهيد
آهين يا حارة ع الزمن
وع الكريم اللي اندين
ومن العليل اللي امتلا
ورغيفنا لو طاله العفن
اصحى يا عم الشيخ حسن
أنا بضرب الطبلة بعصا
يمكن يفوق اللي عصى
وبلدنا تفرد أمرها
ونتوب بقى من القَرْفَصَه
افهم يا شيخ المرقصه
صحي شبابك صحصحيه
إديله بق وفوقيه
قوليله قطرك لو مِشِي
فَاتَكْ وعمرك ما تلاقيه
اصحى يا حاج الشيخ نبيه