لا للنظـــام
أنا مِشْ حابقى مٍ الصابرينْ
وَعِيشْ عُمري كدهْ مسكينْ
فطاري حَافْ وغدايا طِينْ
أنا مِنْ حَقِي أَتْمَرَدْ وأقولْ
أنا مش حابقى م الصابرينْ
دَنَا مصري وأبويا الدين
وِمَصْر تِدُقْ فينا حَنينْ
وباني المجد بِكفوفي
ومتلفع بهمي سِنينْ
سيبوني يا خَلْق أتمردْ
وقول مش حابقى م الصابرين
يا حِزْب الهم آخرك فين
وِسَايق بينا ليه وِلْفين
دنا شايل قسايا سنين
ومِتْغَربْ كما الملايين
وِتُهْنا في البلاد تُوهه
من المغرب لِحَدْ الصينْ
وِعَبَّاره تِغَرْقني وِتْخَصْخَصْني ليه ولمين ؟
دَنَا إنسان وَنَا حَيْران ونا مِشْ عيبهْ
أَتْمرَدْ وقول مِشْ حابقى م الصابرينْ
أنا باسمَكْ يا حِزْب الكَرْبْ
بلاقيني في قِسمة وِضَرْب
وتاكل لَحْمتي وِزَرْعي وِتُكْرُشْني كَأِني الكَلبْ
كَأني من عَدِوينَكْ وبينا في العداوة حَرْب
ما ترحل عني وتسيبني أعيشلي يومين
وقول للدنيا يا دنيا أنا قادرْ وِمِشْ مِسكينْ
وِقِيدْ الحِزْب كَسَّرْتُهْ وحطَّمتُه بعزْم متين
وِصُوت الحقْ حَرَّرْني ولا عِدْتِشْ من الصابرين
*****
ـ نُشرت هذه القصيدة فى موقع دنيا الرأى رابط :
