قـلـــوب
قلوب ياما بَقَابِلْها وفيها الحب مِدَاري
وِعَرْفاني وِفَهْماني وِكَاتْمة كُل أَسراري
في وقت الشِدَّة بلاقيها قصادي وجنبي وجاري
قلت أفسر الحالة واشوف السِرْ ينفعني
لقيتني تُهْت في أحوالي وأنا حيران ومش داري
وشفت قلوب تِطَقْ شرار وتتمنى تِكَعْبِلني
ويوم ما أعلى ويوم ما أختار تِصَغَّرْ فيَّ وتكيدني
ولو شمسي ما طلعتشي بتلبس م الفَرَحْ بني
ورغم ده كله بدعيلها وقول يا رب تهديها وقويني
ونجيني وابعد شرها عني
وشفت قلوب مِنَدِيَهْ وفيها الفرح طوالي
وغيرها قايده في جُهَنم وفيها الحِقْد بيلالي
ولا تِسَاعِد ولا تِوَاسي وكل كلامها ونَا مالي
مه أنا بس في الدنيا بشوف وافرِزْ ومش عارفه
لكن لا الحِلْو يِدارَّي ولا نا فاهمة أحوالي
وقلوب تسقيك بِحنية وفيها الآية مقريه
وحب المصطفى فيها وِخَمْسِتْها كما الميه
وقول يا رب سبحانك مليت الخلق مِدِّيه
ومن فضلك وإكرامك قلوب الناس مداويه
*****
